Vieiros

"Hai que ser moi cínicos para afirmar, como fai o PP, que esta modificación da Lei de función pública garante a liberdade lingüística e o bilingüismo cordial", laiábase este martes Carlos Callón, presidente da Mesa pola Normalización Lingüística. Recordou Callón o "amplísimo consenso roto unilateralmente polo PP", e insistiu en que o persoal ao servizo do Goberno ten que saber galego e castelán, "mentres que o PP quere abrir as portas para que non teñan que saber o galego".

"Nós defendemos que o funcionariado teña que saber galego e castelán, o PP quere que só teñan que saber castelán. Onde está o bilingüismo? Onde está a cooficialidade? Onde está a liberdade?", preguntou. "O que pretende facer o PP é converter a quen fala en galego nun cidadán ou unha cidadá de segunda", reprochou Callón.

A Mesa acusa o PPdeG de converter a Xunta na "única administración do mundo" na que o funcionariado "non teña que coñecer as linguas oficiais", ante a modificación da Lei de función pública por parte do Executivo para permitir que os opositores escollan a lingua na que realizar as probas. Defende o colectivo que o galego, ao igual que o castelán, "é un requisito de capacidade" e "non chega con ter un título para eximir de realizar probas específicas para a súa comprobación". "Ter a licenciatura de Dereito non eximiría de examinarse da parte xurídica do temario das oposicións", argumentan a modo de exemplo. Deste xeito, piden que se requira "cando menos" unha proba en galego como "o mínimo que se pode reclamar".