|
|
|
 |
|
[27 de Maio] Ata outras! Finalizo esta campaña como a empecei: con resaca. Os procesos electorais acaban comigo.
Tan así foi, que cando abrín o frigorífico para ver de almorzar algo, acababan de pechar os colexios electorais. Algo que non me preocupou porque, como saben, xa votara por correo. Papei uns cereais vendo as enquisas de Sigma Dos, Demoscopia e Eco Consulting, e case me atraganto vendo que Paco Vázquez e Cabezas perdían a maioría absoluta. Máis se deberon atragantar eles, sobre todo Paco, anque logo os votos reais lle devolvesen certa tranquilidade. Pero só polo apuro que debeu pasar xa pagou a pena esta xornada electoral, abofé. Lástima que ao final todo quedase nun susto. Isto do escrutinio e das enquisas a pé de urna é igualiño ca Eurovisión. Vai Verónica Codesal gañando toda a noite e ao final, por uns cantos votos, gáñanlle as turcas. Algo parecido debeu sentir Trinidad Jiménez, menos mal que tiña a Pepiño Blanquito (que aínda vota en Lugo) para interpretar os datos estilo Uribarri. E ao final Trini perdeu con bastante marxe, a suficiente como para que os artistas simpatizantes non lle boten a culpa a Mendiluce. O mellor das xornadas electorais é seguilas pola TVG. A xogada que adoita facer Tino Santiago, facéndonos aturar aos pelmas de Blanco Valdés e Ramón Villares mentres saen os resultados por concellos na parte de abaixo da pantalla, vai polo camiño de converterse nun clásico televisivo, como En xogo goles. A min polo menos dábame a sensación, cando saían Muxia ou Fisterra coas súas maiorías do PP, de que Caldeiras Galifar me estaba ofrecendo este gol. Para compensar, metinme un pouco no chat de Vieiros, no que Ánxel Vence tentaba calmar a furia dos siareiros do Bloque, que se lamentaban para variar da merda de país que somos, de que temos o que merecemos, a culpa é da UPG, etc. Amigos, tranquilidade… contra a adversidade sempre é mellor pensar no pior que lle foi ao outro. Pensen en Corina, en Manolita, no susto de Paco, en Beth... e non fagan autocrítica por outros. Eu pola miña parte despídome para facer autocrítica destes días en que lles dei a vara pensando en alto en Vieiros. Vou chamar a Tino Santiago para que me convide como analista nas próximas eleccións, a ver qué tal está o catering da TVG. Xa lles contarei. Bicos. ............................................................ «« Portada da edición |
|
|
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
