A editorial Kalandraka, especializada en literatura infantil, foi das primeiras en anunciar en decembro a publicación dun álbum de debuxos baixo o título
Nunca Máis. A ollada da infancia, no que plasma a visión que os nenos galegos tiñan da castástrofe.
En xaneiro, a editorial catalana Brosquil Edicions saca do prelo
Mai més Nunca Máis. Els escriptors contra el silenci, unha homenaxe dos escritores cataláns ao pobo galego, coordinada por Xulio Ricardo Trigo. Proba do interese que esperta o tema en Cataluña é o lanzamento nas mesmas datas do libro de Suso de Toro,
Máis Mes: Diari Urgent d´una catastrofe, unha compilación das súas crónicas xornalísticas. O escritor compostelán aínda asinará outros dous libros en galego e castelán:
Nunca Máis. Galiza á intemperie e
Nunca Máis, respectivamente.
Na primavera xurde unha nova remesa de libros de negra inspiración. A editorial Difusora das Letras opta por axuntar os materiais do movemento cidadán (fotografías, cartaces, postais, banda deseñada... ) en
Nunca Máis: A voz da cidadanía. Pola súa parte, as editoriais Xerais e Espiral Maior, mais a Federación de Libreiros de Galicia, únense para sacar á luz a antoloxía
Negra sombra, intervencion poética contra a marea negra, na que participan un cento de poetas consagrados. Unha iniciativa similar é
Nunca Mais: si tots nosaltres son la mirada i el vent, en catalán, castelán e galego
O ensaio vén da man de Candeia, que aborda as diferentes dimensións do desastre a través de oito plumas, entres elas as de Xosé Luís Barreiro Rivas, Xoan Ramón Doldán e Miguel Anxo Murado, no volume
Prestige: a catástrofe que despertou a Galiza?.
A primeira publicación que defende a xestión do goberno sae en maio,
Tierra de Titanes. Prestige: la verdad a flote, a cargo dos xornalistas de
El Correo Gallego, Caetano Díaz, Luis Pousa e Carlos Luis Rodríguez. Outro que se amosa especialmente crítico coa oposición é o economista Pedro Arias, colaborador de
La Voz de Galicia con
El barco de los locos. En outubro, a Consellería de Familia preséntase como exemplo a seguir no libro
Coordinación del voluntariado en el litoral gallego. Caso Prestige.
Nas antípodas das intencións dos anteriores, atópanse as obras
Des Prestige. El ocaso del PP ante la mayor catástrofe ambiental de España do xornalista de
El Mundo, Gustavo Catalán Deus, e
Los piratas del Prestige. De la Casa Blanca a la Zarzuela., do xornalista de
Egin Ibán Cortazar.
As compilacións de autoría colectiva parecen ter éxito. Galaxia presenta en agosto na Feira do Libro da Coruña, a obra
No País de Nunca Máis, con fotografías de Xurxo Lobato e textos de Manuel Rivas e Suso de Toro, entre outros. E a Asociación de Escritores en Lingua Galega tamén deixa constancia escrita dos sentimentos que lle provoca a catástrofe en
Alma de beiramar, unha escolma de textos de 80 autores.
Os acontecementos tamén foron recollidos a través da fotografía por Manuel Sendón, autor de
Cuspindo a barlovento; e a través da banda deseñada, polo colectivo Chapapote, no álbum
H2Oil, e polo Consello da Cultura Galega, no cómic
Parando a Marea Negra.
Outras achegas de ficción son a do escritor Luís Rei Núñez, que narra a historia dun xornalista da TVG que ve naufragar a súa vida a canda o Prestige en
O corvo do chapapote (Edicións A Nosa Terra), e o libro infantil de Agustín Fernández Paz,
A praia da esperanza.
Tamén merece a pena mencionar os boletíns de información alternativa xurdidos durante a catástrofe, desde o propio
xornal de Nunca Máis, o boletín
Contramaré, que desde Aguiño se difundiu a través do correo electrónico, ou a revista Batiscafo.
Este artigo non recolle a totalidade das publicacións relacionadas co Prestige por razóns de espacio.
Nesta ligazón poden coñecer algunhas obras máis.
